एक हजार ७ सय १९ जना चालक ट्राफिक प्रहरीको कारबाहीमा

काठमाडौं । पछिल्लो चौबिस घण्टामा सवारी नियम पालना नगर्ने एक हजार ७ सय १९ जना चालक ट्राफिक प्रहरीको कारबाहीमा परेका छन् ।

काठमाडौँ उपत्यका ट्राफिक प्रहरी कार्यालयका अनुसार मादक पदार्थ सेवन गरेर सवारी चलाएका एक सय १३ जना, यान्त्रिक अवस्था ठीक नभएका ३५, सङ्केत बत्ती उल्लंघनकर्ता १०२, तीव्र गतिमा सवारी हुइँक्याउने ९३, लेन अनुशासन पालना नगर्ने १७९ र सार्वजनिक यातायातका साधन असुरक्षित ढङ्गले सञ्चालन गर्ने ३८ सवारीसाधनका चालकलाई कारबाही गरिएको हो ।

यसैगरी, अनावश्यक रुपमा हर्न बजाउने ४६ जना, निर्धारित स्थान भन्दा फरक ठाउँमा यात्री चढाउने र ओराल्ने २० जना र अन्य सवारी नियम उल्लंघन गर्ने एक हजार ९३ जनालाई कारबाही गरिएको छ ।

ट्राफिक कारबाहीबाट ११ लाख ८४ हजार ५०० राजस्व राज्यकोषमा दाखिला भएको छ ।