ओइल दर्पण 
काठमाडौं । पेट्रोलियम पदार्थको मूल्य र नाफा–घाटाका विषयमा सामाजिक सञ्जालमा भ्रामक र नकारात्मक सूचना फैलिएको भन्दै नेपाल आयल निगमले गम्भीर ध्यानाकर्षण भएको जनाएको छ ।
निगमले सोमबार विज्ञप्ति जारी गर्दै अन्तराष्ट्रिय बजारमा इन्धनको मूल्य अत्यधिक बढेका कारण आफूहरूले पाक्षिक रूपमै करिब ७ अर्ब ८१ करोड ६१ लाख रुपैयाँ घाटा बेहोरिरहेको बताएको छ ।
निगमका अनुसार इन्डियन आयल कर्पाेरेसन (आईओसी) बाट चैत १७ (मार्च ३१) मा प्राप्त पछिल्लो मूल्यसूचीअनुसार पेट्रोलियम पदार्थको खरिद लागत निकै उच्च छ । लागत मूल्यको तुलनामा आन्तरिक बजारमा मूल्य कम हुँदा निगमले भारी नोक्सानी खेप्नु परेको छ ।
निगमले सार्वजनिक गरेको तथ्यांक अनुसार हाल सबैभन्दा बढी घाटा एलपी ग्यास र डिजेलमा छ । मूल्य समायोजन गर्दा समेत निगमलाई प्रतिसिलिन्डर ग्यासमा ३ सय ३१ रुपैयाँ २५ पैसा र डिजेलमा प्रतिलिटर ८७ रुपैयाँ ९९ पैसा घाटा भइरहेको छ ।
त्यसैगरी, पेट्रोलमा प्रतिलिटर २ रुपैयाँ ३२ पैसा, मट्टितेलमा ३६ रुपैयाँ ७० पैसा र आन्तरिक तर्फको हवाई इन्धनमा ९२ पैसा प्रतिलिटर घाटा रहेको छ ।
आईओसीबाट प्राप्त दररेट अनुसार निगमलाई पेट्रोलको खरिद लागत प्रतिलिटर २ सय २१ रुपैयाँ ३२ पैसा पर्छ तर खुद्रा बिक्री मूल्य २ सय १९ रुपैयाँ मात्र तोकिएको छ । त्यस्तै, डिजेलको लागत मूल्य प्रतिलिटर २ सय ९४ रुपैयाँ ९९ पैसा पर्नेमा जम्मा २ सय ७ रुपैयाँमा बिक्री भइरहेको छ ।
एलपी ग्यासमा एक सिलिन्डरको लागत २ हजार ३ सय ४१ रुपैयाँ २५ पैसा पर्ने भए पनि उपभोक्ताले २ हजार १० रुपैयाँमा खरिद गरिरहेका छन् । यस्तो जटिल वित्तीय अवस्था र चरम घाटाका बाबजुत पनि बजारमा पेट्रोलियम पदार्थको आपूर्ति व्यवस्थापनलाई सहज बनाइराखेको निगमले दाबी गरेको छ ।
